|
Молитва ко Пресвятой Богородице пред иконою
"Млекопитательница"
Прими, О Госпоже Богородительнице, слезная моления
рабов Твоих, к Тебе притекающих. Зрим Тя на святей иконе, на руку носящую и
млеком питающую Сына Твоего и Бога нашего, Господа Иисуса Христа. Аще и без
болезней родила еси Его, обаче матерния скорби веси и немощи сынов и дщерей
человеческих зриши.
Темже тепле припадающе к цельбоносному образу Твоему
и умильно сей лобызающе, молим Тя, Всемилостивая Владычице: нас, грешных,
осужденных в болезнех раждати и в печалех питати чада наша, милостивно пощади и
сострадательно заступи, младенцы же наша, такожде и рождшия их, от тяжкого
недуга и горькия скорби избави. Даруй им здравие и благомоощие, да возрастают
питаемии от силы в силу, питающия же их исполнятся радостию и утешением, яко да
и ныне предстательством Твоим из уст младенец и ссущих совершит Господь хвалу
Свою.
О Мати Сына Божия! Умилосердися на матери сынов человеческих и на
немощныя люди Твоя: болезни наша скоро исцели, належащия на нас скорби и печали
утоли и не презри слез рабов Твоих. услыши нас в день скорби, пред иконою Твоею
припадающих, и в день радости и избавления приими благодарная хваления сердец
наших.
Вознеси мольбы наша ко Престолу Сына Твоего и Бога нашего, да
милостив будет ко грехом и немощем нашим и пробавит милость Свою ведущим имя
Его, яко да и мы, и чада наша прославим Тя, Милосердную Заступницу и верную
надежду рода нашего, во веки веков. Аминь.
|
